شاهي قصبة

 بعد القصبة 1 ، ما قعد من النظام القديم كان محمد الغنوشي

الكلها طارت وزرة و كتاب دولة ، وكنا في لوجيك بتاع ثورة في نطاق فترة انتقالية

 محمد الغنوشي إلي مناش باش نقولو ملايكة أما تحب و إلا تكره كان أهون واحد في اتعاسه
   

 رغم هذا و دونو إجماعة طلعوا ثوار أكثر منا الكل و عملوا القصبة 2
  

وكيف تسال علاش إيقلك : يجب القطع نهائياً مع النظام السابق و نحبو إستكمال أهداف الثورة

تقلو : راهو إلي تعمل فيه ما يخدم مصلحة كان الخوانجية

 و راهو كان مش هوما ورى تمويل الاعطصام ما ايصير شي

و راهو باهي إنا معاك في الفكرة أما راهو لومور ما تصيرش هكا

و راهو الاعطصام هذا ماهو إلا إستعراض قوى عملتها النهضة

و راهو "أن فوا" يتقواو راهو باش إيسيبو الخنن بتاعهم في البلاد وباش يبداو في التجاوزات

و هاو نحي إمام هذا و حط لاخر... راهو باش ايدورو يحكموا بحكامهم

 و راهو  من باعد أي حكومة  باش تجي ما عادش تنجم تعمل معاهم شي خاطر باش ايكنوا خراو عليها دجى 

و راهي بش تراسيلهة تاخذ وتعطي معاهم هذا في أحسن الحالات و إذا ما جاتناش حكومة
 تاعبة جملة و خافت منهم  وقتها يتسيب الماء عالبطيخ

 و يا ولدي ايجة نشوفو كيفاش إنجموا نبدلو لومور من غير ما نخدموا الخوانجية خير و
 راهو و راهو و راهو 

إيقلك : لا يا راجل هذيكه فزاعة و الخوانجية ما يسواو شي والخوف الكلو كان من محمد الغنوشي

تقلو : باهي كيف هكا ضهرلك و مدامك حربي و قارح، نتهنى بيك و "د توت فسون " كيفما وقفت ليوم خاطر متقلق من شخص واحد تو تاقف نهارت إلي تشوف لعوج ونهارت
 إلي تشوف الضبوعة هربت بالثورة

إيقلك : هذا كلام ، انها لثورةٌ حتى النصر ... ما عندك كان الرجال ... إلي طيح بن علي ، موش باش إيحير في بزقليف و لحي مغوفة ... هنا هوني واقفين و راهي مش كان نفحة ، و احنا شادين صحيح

إيطيح محمد الغنوشي وايجي المجلس التاسيسي و تلعب النهضة لعبها وتشري إلي يتشرى و تخلص إلي يخلص ، تبلفط إلي يتبلفط و تخوف إلي إيخاف

تلعب النهضة لعبها مع النظام السابق و إستكمال أهداف الثورة ما نشوفو منها كن الكلام و الخلافة

الديمقراطية و تبنات و الإنتخابات كانت شفافة ، و سي جبالي وزير أول و المرزوقي راءيس و الكعكة تقسمت

و الناس شايخة و فرحانة و ملمومة كان لزم وتعمل في "تشين تشين" من كامل اللطيف
 إلى حامد القروي ... تلمت الأحباب وجات من كل قبيلة وما عاد تفرز النظام السابق من النظام إلي قبل سابق

وتخالطت نهضة و تجمع و تنسات أهداف الثورة

وكيف تقلو كيفاش تي وينك يا سي

تي وينك يا بتاع النظام البايد تي وينك يا بتاع انها لثورةٌ حتى النصر

ما تسمع شي ... و ما عاد ثمة حد إيجاوب

تقلو: ما تحبش على قصبة تشيخ بها وتفرهدك

إيقلك : وووووه يا وخي قعدتو كان تشهيو فينا

تقلو : تتذكر كيف قتلك

إيقلك : كنت فيبالي فزاعة

وقتها ما تنجم تقلو كان : برى يعطيك قصبة

"بناء المستقبل لا يكون بغمرة و عربدة الضّوضاء و تشنّج الهويّات الشّخصيّة أو التّصوّرات مهما كانت"